Sorkar leh Truck driver inkarah buaina: Tanhril FCI kudam tangin buhfai phur chhuak rih dawn lo

by News Editor

Tualchhung News

ZORAM TODAY| 18th August, 2024 (Sun): Mizoram Truck Driver Association (MTDA) Gen. Hqrs chuan vawiin khan thuchhuah siamin, FCI kudam Tanhrila buhfai la tur truck driver te Traffic Police te'n man a, an driving license te an lak sak avangte leh buhfai load tura din an phalsak loh avangin naktuk August ni 19, 2024 atangin thu leh awm hma chu buhfai phurh chhuahloh nise, an ti.

MTDA chuan, Mizoram mipui eitur buhfai Tanhril FCI godown a lut leh chhuakte parking place chungchangah May ni 5, 2017 ah Hon'ble Minister FCS&CA office chamber ah meeting neih a ni a. Hemi thutlukna bawhzui hian June ni 1, 2017 ah T.T. Zothansanga, Parliamentary Secy. FCS&CA kaihhruaina hnuaiah FCI (FSD) office Tanhrilah Joint meeting neih a ni an ti a.

Hetah hian Truck Parking Place kum 2016 chhunga marking siam tawh Truck & MZU

Bus movement te a hmunah June ni 2, 2017 khan a tul ang ang te bawhzui nghal a nih thu an tarlang a.

Harsatna leh buaina tun hun thlenga kan neih loh laiin August ni 16, 2024 khan Traffic S.P in a naute rawn tir thlain Truck Buhfai phur tur driver engemaw zat an rawn man an ti a, "An driving lisence te rawn manin, hma an rawn la a. Mahse kan hotute nen an inbiak fel hnuah driving lisence an man te chu an pe let leh" an ti.

MTDA chuan, mahse, August ni 17, 2024 (Sat) khan Traffic S.P in an naute rawn tir tha lehin, Truck load la tura kawng sira dingte ding tawh lo turin min ti leh si an ti a.

"Tanhril FCI atanga Supply Buhfai Mizoram hmun hrang hrang a dah tur phur chhuak thinte, truck load min phal sak tak loh avangin August ni 19, 2024 (Mon) atanga thuleh awm hma chu Mizoram Truck Driver Association (MTDA) te chuan Tanhril FCI godown atangin Buhfai phur chhuah rihloh nise kan ti," tiin an thuchhuah ah tarlan a ni.